சுவர்களற்ற ஈழத்து வீட்டில்

இன்னும்
சில நிமிடங்கள் பொறுத்திருங்கள்
சுவர்களற்ற ஈழத்து வீட்டில்
எனது ஒருவயது மகன்
தாயின்றி பசித்த வையீறுடன்
காய்ந்த கண்ணீர் கறைகளுடன்
நெஞ்சோடு இறுக்கியபடி உறங்குகிறான் ..

வந்தவர்களுக்கு உரிமையா
என்று அவனும்
உரிமை உயிரென்று
நீங்களும் துப்பாக்கி ஏந்தட்டும்
யுத்த களத்தின் பரப்புகள்
எல்லைகளற்று , திசைகளற்று விரியட்டும்
இறுதியில்
நீண்ட யுத்தங்கள் முடியட்டும்
மனிதர்கள் யாருமின்றி
குண்டுகள் துளைத்த வெற்றி கொடிகளுடன்

மரணம் விட காயங்களுடன்
தாய் தேசம் பயணிக்கிறோம்
நேற்று வரை இருந்த
எனது தேசம்
எனது வீடு
எனது மனைவி
எனது மகன்,மகள்
எனது வாழ்க்கை யாதுமேன்றி
அகதி அடையாள அட்டையுடன்

அரசியல் நாய்கள்
வட்ட மேஜை மாநாடு
முடித்து முடிவெடுக்கும் வரை
உயிரோடு இருப்பாரா
பசியால் கதறும்
எம் தேசத்து குழைந்தைகள்

உறக்கமற்ற கண்களிலும்
அழகிய கனவு ஒன்றுண்டு
பள்ளி சென்ற
சின்ன சின்னஞ்சிறு குழந்தைகள்
எண்ணிக்கை குறையாமல்
வீடு வந்து சேருவார்
பின்னொரு நாளில்
கதைகள் பேசியபடி உறங்கிடுவோம்
பீரங்கி,துப்பாக்கி சத்தமற்ற
இரவுகளில் பசியின்றி நிம்மதியாய்

இன்னும்
சில நிமிடம் பொருத்திருங்கள்
அழுதபடி உறங்கிடும் மகன்
ஆழ்ந்த நித்திரை கொண்டதும்
பீரங்கி குண்டுகளை வீசலாம்
வலியின்றி
என் மகனாவது சாம்பலாகட்டும்
இறந்தும்
சிதைந்து போன தாயை தேடி
மரணத்தின் மயானத்தில் என்னோடு ....